煩厭．低能．無賴

大公司的客戶服務熱線之煩厭，不用多說。

打電話到one2free，系統要你先輸入電話號碼。OK，理解。

但為什麼當你同客戶服務員直接對話的時候，他又要再問多一次呢？

以下是最新近之對話：

「先生，麻煩你電話號碼吖。」

「我頭先咪入咗囉。」

「係呀，要再入多次。」

「咁我頭先入嚟做咩呀？」

「系統睇唔到，麻煩再輸入多次。」

「再輸入多次？！ok！」心諗，「輸入多次？！」仲唔同你玩。

手指開始按「9」、「1」、「0」、「x」、「x」、「x」、「x」、「x」

「先生，接通咗之後，唔駛再㩒㗎啦。」

「我知呀，你叫我輸入呀嘛，冇叫我講吖！」

……

收線後，我亦不禁同隔離位的staff講：「我真係好無賴。」

不過，當煩厭與低能會令到自己谷氣，唯有找一個自娛的方式來應付：做一個無賴。