一早做政事

以下是昨天（15/1）寫下的稿。

落筆時也察覺用澳門來比較帶點牽強。不過，為了某些從來睇錢份上的香港人，這個方法可能更直接易明；所以「夾硬嚟」咗一次。

不過信奉求其命的我，還是依賴突如其來的反應：「我知妳善忘同埋善變」。

多謝主席，同時亦都要多謝民主黨。因為如果唔係民主黨喺舊年6月，投咗神棍嘅一票，我哋呢一班支持香港民主發展嘅朋友都好難有機會濟濟一堂，喺星期六嘅朝早，聚首喺呢個議事廳，縱使我哋明知不何為而為之。

今日我哋喺討論《行政長官選舉(修訂)條例草案》同埋《立法會(修訂)條例草案》，兩條獨立嘅條例草案，偏偏被安排捆綁喺同一個會議舉行。行政長官代表行政機關， 立法會係立法機關，由民主黨喺舊年選擇出賣選民、背棄盟友，同特區政府捆綁式談判兩條原本獨立嘅條例草案開始，我哋就知道，兩個本來互相制行嘅機關，註定只可以狼狽為奸。

特區政府喺舊年十月公佈咗兩個選舉辦法嘅細節之後，坊間主要集中討論屬於立法會，所謂「超級區議員」嘅提名門檻同埋選舉開支上限，而提及行政長官嘅產生辦法就相對零聲落索。理有好簡單，因為傳媒覺得冇嘢好講。一來全港700萬人就得1200人有得選，二來，跟本成個方案，由09年11月第一次提出直到舊年6月投票通過之後，原封不動。因為民主黨棄兵曳甲，投票通過嘅時候，丁點都冇修訂過，即係民主黨支持一個比05年時候提出，更倒推嘅一個方案。因為05年嘅時侯，起碼個選舉委員會都提意增加到1600人啦。

一國兩制全世界只有中國實行，所以除咗澳門，好難搵到另一個地方同香港類比。澳門有60萬人口，選舉委員會有300人，即係0.05%，係好少㗎。不過都多過香港成三陪，因為跟據而家嘅草案，我哋700萬人，得1200人有得選特首，少過0.02%。難怪，近年好多香港人羨慕澳門人，一海之隔，人哋近幾年嘅人均收入不斷上升，每年淨袋五，六千蚊。澳門人不斷向上流，香港人就係比呢啲出賣香港嘅政棍一手推到我哋向下流。所以冇民主就冇民生！

今日我就用民主黨創黨元老司徒華先生嘅一句名言：「成功不必在我，功成其中有我」送比民主黨。自從你哋喺去年春夏之交的政治風波，屠殺誠信之後，我哋知道爭取民主嘅政黨已經撒手塵寰。我哋一定會鼓動選民，發揮力量，全力接好民主棒！

經常說議會生活不是我杯茶；一早九點，口齒不清，嚴重窒脷。還是覺得越夜越美麗。

還有，慢必和劉嗡的發言緊隨。